តើបាតុភូតចិត្ត ចែកជាប៉ុន្មានប្រភេទ?

គេចែកបាតុភូតចិត្តជាបីប្រភេទគឺ
១. លំនាំចិត្ត (Mental Processes): គឺជាបាតុភូតទាំងឡាយណា ដែលប្រព្រឹត្តទៅក្នុងរយៈពេលមួយខ្លី វាមានការចាប់ផ្តើម ការប្រព្រឹត្តទៅ និងការបញ្ចប់។ លំនាំជាមូលដ្ឋានគឺៈ

• លំនាំពុទ្ធិៈ ដូចជា ឥន្រ្ទីយារម្មណ៍ ប្រត្យក្សារម្មណ៍ លំនឹក ការគិត ភាសា រូបារម្មណ៍… ដែលបង្កើតបានជាជីវិតពុទ្ធិរបស់មនុស្ស។
• លំនាំសញ្ចេតនាៈ ដូចជាចិត្តរំភើប និងសញ្ចេតនា ដែលបង្កើតបានជាជីវិតសញ្ចេតនារបស់មនុស្ស។
• លំនាំឆន្ទៈ និងអំពើ ដែលបង្កើតបាជា ជីវិតឆន្ទៈរបស់មនុស្ស។

គឺនៅក្នុងទិដ្ឋភាពទាំងបីនេះហើយ ដែលស្តែងចេញនូវសកម្មភាពចិត្តរបស់មនុស្ស។

២. សភាពចិត្ត (Mental States): គឺជាបាតុភូតចិត្ត ដែលប្រព្រឹត្តទៅអស់រយៈពេលយូរបន្តិច។ ជាធម្មតា សភាពចិត្តដើរតាមលំនាំចិត្ត ដទៃទៀត ដោយយកលំនាំចិត្តទាំងនោះធ្វើជាបង្អែក។

៣.​ លក្ខណៈចិត្ត (Mental traits): គឺជាបាតុភូតចិត្តទាំងឡាយ​ ដែលប្រព្រឹត្តទៅអស់រយៈពេលយ៉ាងវែង ជួនកាលរហូតអស់មួយជីវិត ហើយមានសភាពនឹងនរ ចំពោះបុគ្គលមួយជាក់លាក់។

ចិត្តវិទ្យា ជាវិទ្យាសាស្រ្ត

ចិត្តវិទ្យាជាវិទ្យាសាស្រ្តព្រោះ ចិត្តវិទ្យាមានកម្មវត្ថុសិក្សាច្បាស់លាស់ មានវិធីសាស្រ្តសិក្សាជាក់លាក់ និងនាំមកនូវផលប្រយោជន៍ដល់សង្គមមនុស្ស។
កម្មវត្ថុសិក្សានៃចិត្តវិទ្យា
កម្មវិត្ថុសិក្សានៃចិត្តវិទ្យា​ គឺបាតុភូតចិត្តរបស់មនុស្ស។
បាតុភូតចិត្ត
បាតុភូតចិត្ត គឺជាបាតុភូតទាំងឡាយណាដែលប្រព្រឹត្តទៅនៅក្នុងខួរក្បាលរបស់មនុស្ស និងសំដែងចេញមកក្រៅតាមរយៈ អំពើ និងអាកប្បកិរិយា (កាយវិការ ទឹកមុខ ពាក្យសំដី…)

ឧទាហរណ៍ៈ បុគ្គល “ក” សប្បាយរីករាយ មានទឹកមុខញញឹម

បុគ្គល “ខ” ជាមនុស្សកាច មានកាយវិការច្រងេងច្រងាង

        បាតុភូតចិត្ត មានលក្ខណៈខុសប្លែកពីបាតុភូតដទៃទៀត ដូចជាៈ

• បាតុភូតរូប ឧទាហរណ៍    ព្រះអាទិត្យបំភ្លឺផែនដី          ទឹកដាំយូរអស់
• បាតុភូតគីមី ឧទាហរណ៍    បាយទុកយូរដុះផ្សិត
• បាតុភូតជីវ ឧទាហរណ៍    ត្រីស្រង់ចេញពីទឹក វាងាប់
• បាតុភូតអគ្គីសនី ឧទាហរណ៍    រន្ទះបាញ់ពេលមានភ្លៀង